Van hardekole wat brand tot Halala Afrika is ons meegesleur op trappe na die hemel

Die sagte ritseling van die aandwind oor die voet van die Helderberg was nie al wat ons hoendervleis gegee het nie.

Versnit 2026 by die pragtige Rust en Vrede was ’n magiese aand waar talent, vriendskap en welwillendheid saamgevloei het. Dit was ’n herinnering dat wanneer ons saamspan, “omgee” waarlik ’n werkwoord word.

Hoogtepunte van ’n onvergeetlike aand 🎶 ’n Musikale reis: Van Elvis Blue se weergalose Mac The Knife en Corlea se kragtige Stairway to Heaven, tot die nostalgiese samekoms van Halala Afrika en When the Saints Go Marching In. Matthys Maree en sy span het gesorg vir ’n program wat deur ons are gepols het, van Hardekole saam met Ricus Nel tot die tydlose Kinders van die Wind deur Ruhan du Toit. 🇳🇱 Internasionale erkenning: ’n Besondere oomblik was die oorhandiging van die Versnit-toekenning aan die legendariese Herman van Veen. Sy deelname was ’n eerlike gesprek van die hart wat bewys het dat menslikheid groter is as enige landsgrens. 🤝 Die hart van Versnit: Wat in 2012 begin is deur boesemvriende Jean Engelbrecht en Louis van der Watt, het gegroei tot ’n baken van hoop. Elke noot wat gesing is en elke glas wat geklink is, help Atterbury Trust om behoeftige studente se drome waar te maak en Afrikaanse kultuur te bevorder. Baie dankie aan ons vennote, Rust en Vrede, en ons getroue borge, Lexus en Toyota Suid-Afrika, wat hierdie netwerk van hoop moontlik maak. Raak betrokke: Blaai gerus deur die album om die atmosfeer te beleef. As jy ook deel wil wees van hierdie sirkel van gee, besoek ons Donasiewinkel en kies “Versnit”. Want ons gee om, en ons weet jy doen ook. ❤️

https://www.backup.atterburytrust.org/product/versnit-2025/

25 Januarie 2025

Daar is verskeie wonderlike aspekte van Versnit wat ons elke jaar opval wanneer ons saam met ons Versnit Vriende in die gees van welwillendheid by Rust en Vrede byeenkom. Samesyn, heerlike gesels en opvang, inspirerende musiek, die aangesig van die asemrowende Helderberg as die agtergrond van die geleentheid, ’n glasie Stellenbosch en Rust en Vrede se beste en natuurlik die wete dat almal wat bydra, ’n werklike positiewe verskil in ’n menigte minder bevoorregtes se lewens aktiveer.

Hierdie jaar, op Saterdag 25 Januarie met die aankoms van ons gaste toe die son net so stadig, rustig sy wenteling begin afwaarts draai, was dit die lig van genoegdoening wat ons harte gevul het. Kleure, klere, glimlagte, bome, krismisrose by die duisend, die genoegdoening van lewens met ’n opbeurende ingesteldheid… alles was getooi in ’n sagte, sonderlinge sonlig, so asof Moeder Natuur haar eie bydrae wou lewer. Vir ons was dit weer ’n toonbeeld van wat kan gebeur in ons kollektiewe gemoed van behulpsaamheid wat ons eintlik die beste sou laat voel; die wete dat almal daar byeen omgee uitstraal as gemene deler.

Die aand se verrigtinge het afgeskop met Pierre Greeff en Die Heuwels Fantasties wat ’n energieke atmosfeer met passie, ritme en snarespel op die verhoog laat ontwikkel het. Toe het Frieda van den Heever ons beïndruk met haar innemende verhoogpersoonlikheid en sang, voor Jean Engelbrecht, Louis van der Watt en Lexus se Anton Falck verwelkomings gedoen en almal herinner het hoekom Versnit se omgee noodsaaklik is om Atterbury Trust se werk standhoudend moontlik te maak.

Toe het ons gereelde gunsteling Elvis Blue, Corlea met haar meesleurende en welluidende pragtige stem, asook Richard van der Westhuizen en Lochner de Kock bewys dat ons Afrikaanse musiektalent werklik wêreldklas is.

Hierdie jaar se Versnit-toekenning vir ’n besondere bydrae tot Afrikaanse kultuur, is vir ’n tweede keer aan een van ons gunsteling skrywers oorhandig. Deon Meyer is vereer vir die wêreldwye reikwydte van sy skeppingsvermoë. Hy het in ’n uitnemende, kort maar kragtige toespraak sy diep dankbaarheid betuig. Deon en Coenie de Villiers het hulle aangrypende Fransman-storie uit die Karoo-Suite opgevoer. Later het hy selfs as agtergrondsanger saam met Die Heuwels opgetree en dít, liewe vriende, sien mens nie elke dag nie.

’n Verrassing van die aand was die energieke PJ Powers, wat die gehoor in vervoering gehad het met haar sprankelende treffers, insluitend Bette Davis Eyes. Nog hoogtepunte was Elvis Blue se treffende vertolking van John Hiatt se Have a Little Faith in Me en Corlea se opwindende, betowerende weergawe van Chris Isaak se aangrypende ballade Wicked Game. ’n Gepaste, gesamentlike afsluiting deur al die kunstenaars is vervolmaak met die saamsing van Johannes Kerkorrel se immergroen Halala Afrika. Verrigtinge het so tot ’n einde gekom en nog ’n Versnit is gevier; vog in die oog, liefde in die hart.

Halala, ewig is ons Afrika

Klik hier en skenk in die gees van Versnit aan Atterbury Trust deur ons Donasiewinkel.

27 Januarie 2024

Enige versnit se mengsel is net soos goed soos die gehalte van die onderliggende elemente. Van toepassing op Versnit 2024, beteken dit beslis dat dié magiese aand se vermenging van die geselskap van vriende wat omgee, Rust en Vrede se wyn en ’n vertoning deur ons land se allerbeste kunstenaars maklik kon kers vashou by enigiets wat mens oorsee kan ervaar. Eintlik meer so, aangesien die ligging en harte wat oopmaak op die maat van musiek sekerlik nêrens anders gevind kan word nie.

Bekende sterre soos Elvis Blue, Karen Zoid, Claire Johnston, Ruhan du Toit en die vyf-Grammy Toekenning-wennende Ladysmith Black Mambazo, almal saam op een verhoog aan die hange van die Helderberg, gebeur mos nie elke dag nie.

Samesyn en saamsing was aan die orde van die dag toe die Vriende van Versnit teen sonsondergang op die grasperk voor Rust en Vrede se herehuis kon bymekaarkom om hierdie jaar se vertoning te kon meeleef.

Maar dit is beslis nie al nie. Die mense wat Versnit 2024 kon bywoon, gee ook om en dít maak al die verskil. Noemenswaardige bydraes deur hierdie groep help Atterbury Trust om ’n menigte ondersteunings-projekte gemik om minder welgesteldes te kan onderhou. As jy ook wil bydra, klik op die Atterbury Trust Donasiewinkel-skakel hier onder, want ons weet jy gee ook om.

https://bit.ly/Donasiewinkel

28 Januarie 2023

Soos die somerson stadig teen die hange van die wonderskone Helderberg sak en die pragtige wingerde van Rust en Vrede blakend gesond spog in die agtermiddag, so daal die betekenis van omgee op ons groep Versnit-gaste neer. ’n Vars bries keer ons nie om weer bande van vriendskap op te tel nie, ’n glasie van Stellenbosch se beste te geniet nie en ook nie om ons uitmuntende plaaslike Suid-Afrikaanse musiektalent te ervaar en waardeer nie. Ja-nee, wraggies waar weer ’n heerlike Versnit-geleentheid is op 28 Januarie 2023 moontlik gemaak deur Louis van der Watt, Jean Engelbrecht, Rust en Vrede en Toyota Suid-Afrika Motors en hulle spogmotormerk Lexus. Maar die eintlike rede hoekom Versnit die instelling is wat dit oor die afgelope 11 jaar geword het, is omdat almal wat deel is van hierdie heuglike samekoms omgee, werklik omgee vir hulle medemens en besef dat hulle bydraes aan Atterbury Trust op verantwoordbare wyse aangewend word om dié van ons wat dit werklik nodig het van hulp te kan wees. Want as ons dit nie doen nie, wie gaan? Vanjaar se kunstenaars het hul alles gegee om betowerende musiek en vermaak op te dis. Ons Versnit-sterre is gelei deur die innemende Stef Bos, wat ook vanjaar se spesiale Versnit-toekenning ontvang het vir sy bydrae tot ons Afrikaanse kultuurskatkis. Elvis Blue, Steve Hofmeyr, Demi Lee Moore, Joseph Clark en Riaan Benadé het vir hoendervleis vermaak gesorg, onder begeleiding van die Versnit Orkes met Matthys Maree, Juan Oosthuizen, Brendan Ross, David Klassen, Denny Lalouette, Bez Roberts, Adam Howard en Mauritz Lotz. Verseker die room van ons plaaslike talent. Agter die skerms is dinge beplan, gereël, bymekaar gesit en uitgevoer deur ’n top-span wat van Versnit maak wat dit is: Alexa Strachan, Anna Davel, Bernard Gramann, Jaco Smit, Johan Griesel, Fanie Pieterse en Jeanne Steenkamp. Baie dankie aan almal wat deel was van Versnit 2023. Met alles waarmee ons almal te doen het in hierdie land, wat ons moet doen om te oorleef, is ons verheug dat julle nog altyd kans sien vir hart oopmaak en gee, gee, gee. Want ons weet julle gee ook om.